• 主曆 20210801 日 常年期第十八主日 第 4041 期

【教友有問題】聖經新舊約裡面係同一天主?

作者: 
阿公
刊登日期: 
2021.07.30
主曆: 
常年期第十八主日

孫仔: 爺爺,我有個重大發現呀!就係爸爸嘅性格變咗好多呢,明明以前好嚴好惡,而家就好仁慈同愛心爆棚。

爺爺: 哈哈!佢幾時都咁愛你㗎!就好似天主愛我哋咁。

孫仔: 佢好似舊約同新約裡面嘅天主咁變咗性情呀!而家個「爸爸」分分鐘係假扮㗎! 

爺爺: 點會呢?好多人以為舊約同新約入面係兩個天主:一個鍾意罰人,一個凡事有愛。其實從來只有一個天主,新舊約係反映緊天主啟示,經歷咗兩個階段,舊約時代係啟示嘅最初階段,新約時代係啟示嘅完成階段。(參教理140) 

因為唔同階段嘅子民,價值觀同文明程度都唔一樣,所以天主採用咗唔同嘅溝通方式唧。

孫仔: 咁樣天主真係一個好好嘅爸爸同教育家啊。

爺爺: 你爸爸可能係學緊天主呢。天主由新約到舊約嘅計劃都係一致嘅,佢恩威並施、完全慈悲而公義。(羅十一22;教理128)當仔女長大咗之後,父母自然要試吓其他溝通方法喇。乖孫,最近你多咗出街,可能因為咁樣,嚇到爸爸要諗新方法同你相處呀! 

孫仔: 弊!我唔記得同爸爸解釋係幫善會做義工㖭! 

爺爺: 既然你日日祈禱同天主傾偈,咁都要日日同爸爸傾偈呀! 

 

 

 

  
捐款支持公教報  http://kkp.org.hk/donation