【教友有問題】「蒙席」係做乜㗎？

教友甲： 公教報報導， 教廷前駐香港代辦尤安泰蒙席（Ante Jozic）最近祝聖做總主教，佢亦會擔任教廷駐白羅斯大使。

教友乙： 蒙席做乜嘢㗎？ 

教友甲： 教宗會頒賜「蒙席」（monsignor）銜頭俾喺教廷工作，或者喺教廷負責外交事務嘅神父。另外，如果有神父對教會有重要貢獻，地區主教亦都可以向教宗推薦佢地領受蒙席銜頭。而主教本身就已經具備蒙席銜頭。

教友乙： 咁睇法，都要有番咁上下年紀先可以做蒙席？ 

教友甲： 係呀，2014年之後，蒙席銜頭只會俾65歲或以上、擔任某啲重要職務嘅神職人員，好似教區主教或副主教，以及喺教廷工作嘅神長。

教友乙： 咁蒙席即係「勁」啲？ 

教友甲： 呢個銜頭係用嚟肯定神長嘅工作，神職人員各有唔同崗位，神恩亦唔同呢。

•相關資訊見 印刷版 第18版

  
捐款支持公教報  http://kkp.org.hk/donation