【教友有問題】墳場點解有聖像？

學生： 老師，今次考察天主教墳場，見識咗好多神父修女同教友嘅墳墓呢。咁點解墳場有咁多聖像？唔通係為咗驅鬼？ 

老師： 你再亂講，我就驅走你。呢啲聖像一來用嚟紀念同識別先人，二來可以反映先人嘅信仰，例如有啲先人孝愛聖母，後人就安一尊聖母像。19世紀嘅墓地比較多安放聖像，而家少好多啦。

學生： 第日我整個「復仇者聯盟」放喺自己墓碑上先得！ 

老師： 墳場有規有矩，況且漫畫形像又唔關信仰事。

學生： 乜都關信仰事咩！我夠見嗰邊有條爛石柱啦，唔通又關信仰事！ 

老師： 折斷嘅石柱有意思㗎，係用嚟哀悼生命嘅驟然消逝。

學生： 哦，我仲以為日久失修添！ 

老師： 墳場維修確係好大工程，而每次打風落雨之後，都會清理同整修墳場，至可以好似而家咁井井有條。

學生： 嘩，咁大笪地方，咪要好多錢維修！ 

老師： 係呀，所以我哋要支持天主教墳場墓地設施嘅募捐呀！ 

（捐款 「教區籌募建堂及發展基金委員會」，
   詳見 http://donate.catholic.org.hk）

  
捐款支持公教報  http://kkp.org.hk/donation