【教友有問題】點解要「聖屋」？

老婆：老公老公，呢間新屋就係我哋捱咗十年麪包嘅成果喇！為咗住得安心啲，阿媽話要「拜四角」當驅吓邪嘢喇，習俗嚟嘅啫，神父唔會鬧啩？ 

老公：神父唔會隨便鬧人，但一定希望教友家庭重視天主呀！ 搬新屋唔駛做埋咁多古怪嘢，請神父「聖屋」就得喇。

老婆：咁快啲叫神父同我哋間屋「開光」喇！ 

老公：開盞燈就光啦。聖屋唔只係神父灑聖水淨化間屋咁簡單，而呢份祝福會入到家庭生活當中。聖屋嗰陣，神父會帶領我哋祈禱同讀聖經，等呢個家成為一個祈禱、愛聖言、愛主愛人嘅地方。一家人和氣平安，就唔駛擔心其他嘢喇。

老婆：聖屋喺屋入面咋？不如再搵個耶穌像放喺門外，擋住邪嘢唔好入屋囉？ 

老公：唔好咁對耶穌啦！屋企供奉嘅聖像，其實係要激發同滋養我哋對基督奧跡的信德（參教理1193），提醒我哋去祈禱嘅。

老婆：咁你今個禮拜望完彌撒，同神父約個吉時聖屋喇。

老公：天主嘅時辰個個都咁好㗎 ！都叫你報名上慕道班㗎喇！ 

  
捐款支持公教報  http://kkp.org.hk/donation