【教友有問題】點解會有中華聖母？

阿女： 媽咪呀！點解聖母有咁多個名？好似今期公教報「區區有聖堂」有個「中華聖母」喎？ 

媽媽： 參與基督救恩奧蹟，同埋响唔同地方顯現嘅聖母媽媽，都係同一位聖母。教會係想借助聖母嘅唔同形象，去幫教友認識佢，同埋效法佢嘅德行，所以至會有咁豐富嘅形象。 

至於中華聖母，相傳响1900年義和團事件嗰陣，中國河北東閭聖堂喺聖母庇佑下避過咗一劫，而聖母亦曾經响東閭顯現，於是當地教友感激聖母，仲好熱心敬禮佢添。 

去到1924年，教廷駐華代表剛恒毅樞機（Costantini）喺上海舉辦嘅第一屆中國主教團會議上面，聯同中國主教奉聖母為中國之后，仲將東閭教堂嘅聖母畫像，作為中華聖母嘅形象添。

阿女： 媽咪，咁點解聖母件件衫都唔同嘅？ 

媽媽： 因為聖母喺唔同地方顯現嗰陣，都會就住當地文化，同埋佢想講比我哋聽嘅信息，著唔同嘅衫去表達嘅。好似我咁，無論返工著制服，抑或响屋企著睡衣，我都係你媽咪嚟㗎嗎？ 

阿女： 中華聖母件衫好靚呀，好高貴呢。

媽媽： 想知件衫點解咁款，留意下期「區區有聖堂」喇。而家先揭去中間大頁嘅「區區有聖堂」，睇吓中華聖母堂嘅愛德服務先 ！ 

  
捐款支持公教報  http://kkp.org.hk/donation