【教友有問題】點樣計四旬期？

老公： 老婆，我有個驚天大發現呀！天主教咁多年都計錯數呀，「四旬期」唔止40日，係有46日㗎！ 

老婆： 老公你精明過頭喇。的確要喺「復活節」推前46日去計。因為主日係慶祝基督死而復活嘅日子，所以要減番四旬期內嘅6個主日。而今年四旬期喺2月17日「聖灰禮儀日」（星期三）開始，到聖週四黃昏「主的晚餐」前結束。

老公： 老婆老婆，你又計錯數喇，喺聖週四結束，咁更加唔係 40日喇！ 

老婆： 四旬期有六個星期，唔計主日有36日，再加埋聖灰星期三至六嗰四日，就有40日喇。 

呢40日係象徵耶穌响曠野守齋祈禱，對抗魔誘，同時紀念以色列子民响曠野流徙40年、諾厄經歷40天洪水。疫情到而家，你日日問我煮啲咩好嘢俾你食，到咗四旬期你應該好好守齋克己呀。

老公： 嘩，今年四旬期第一個星期五就撞正年初八！不過唔怕，鮑魚都係魚喇啩，可以笑住守齋！ 

老婆： 今次輪到你計錯數喇！食奢侈品仲算係守齋？等我哋一陣望完網上彌撒再慢慢同你研究四旬期餐單喇。

  
捐款支持公教報  http://kkp.org.hk/donation