【教友有問題】苦路變得咁時髦？

爸爸： 阿仔，點解四旬期拜苦路你會叫我同阿媽默想到生活嘅困難㗎？乜唔係跟住啲小冊子，默想基督嘅苦難就得咩？ 

阿仔： 其實我哋要同基督一齊行苦路㗎，所以默想部份可以連繫而家嘅生活。有神長寫過「環保苦路」，趁四旬期鼓勵大家反省自己同大自然嘅關係；教宗响羅馬拜苦路嗰陣，默想內容都會連繫到當代社會問題或者教會處境㗎。

爸爸： 乜苦路可以隨便改動咩？ 

阿仔： 苦路善工係教會傳統入面嘅熱心敬禮。默想內容可以靈活安排。

爸爸： 我都想喺拜苦路嗰陣為香港嘅疫情祈禱呀。不過暫時返唔到堂區拜苦路，點算好呢？ 

阿仔： 阿爸，你放心喇，我可以陪你响屋企默想苦路㗎，網上都有好多聖地嘅拜苦路短片，俾我哋跟住去默想㗎。

爸爸： 阿仔，咁你上網開條片一齊睇喇。可以睇片一邊拜苦路，一邊欣賞聖地靚景，又幾好喎 ！ 

阿仔： 阿爸，係拜苦路，唔係旅行呀！ 

  
捐款支持公教報  http://kkp.org.hk/donation