【教友有問題】「救主慈悲主日」係乜？

阿仔： 媽咪，今個禮拜嘅「救主慈悲主日」係乜嚟㗎？ 係咪因為救主耶穌好似爸爸咁慈祥呢？ 

媽媽： 阿仔，你阿爸嗰種性格叫腍善，耶穌就真係慈悲喇。耶穌慷慨去愛同寬恕其他人，亦鼓勵我哋咁樣做㖭。為咗宣揚呢份慈悲，耶穌喺1931年顯現响波蘭嘅聖傅天娜修女（Faustina）面前，再一次肯定咗佢嘅慈悲本質，佢亦希望復活期第二主日係救主慈悲節日，俾大家透過敬禮去學習呢份慈悲。

阿仔： 媽咪，係咪敬禮咗，我哋就會慈悲啲？咁你快啲陪爸爸參加敬禮喇！ 

媽媽： 敬禮救主慈悲，要從心去信賴耶穌。我哋無論幾痛苦，都要信賴佢嘅慈悲可以醫治我哋；同時要關心其他人，為臨終嘅人同心硬嘅罪人去祈禱；亦都要珍惜復活主賞賜嘅平安，辦好修和聖事。

阿仔： 媽咪，你係咪都贊成我哋都要學耶穌咁慈悲呢？ 

媽媽： 阿仔你點解咁問？我哋梗係要學習耶穌喇！ 

阿仔： 對唔住，我跌爛咗個手機，我知道媽咪你會大發慈悲，原諒我嘅！ 

媽媽： 慈悲，一定慈悲，你冇得打機，我立即就去感謝天主㖭呀！ 

  
捐款支持公教報  http://kkp.org.hk/donation