【教友有問題】點解要守聖體齋？

孫仔： 爺爺你就開心喇，而家有番平日彌撒，可以朝朝去望彌撒領聖體呢。你記住食咗早餐先去呀，萬一血糖低暈咗，啲人咁驚疫情，都唔知埋唔埋嚟幫你好！ 

爺爺： 乖孫，我有分數！不過領聖體前有段時間唔食得嘢㗎，因為要守「聖體齋」，即係領聖體前一個鐘唔食固體或流質食物，淨係可以飲清水同食藥。因為聖體聖血係耶穌嘅身體同寶血，就要好好尊重。

孫仔： 爺爺，老竇話，長者、病人同照顧佢吔的人都可以寬免呀，一向老竇都係先帶我吔去飲茶，之後就望彌撒㗎喇。

爺爺： 你老竇驚你吔餓暈啫。守聖體齋，都係靜候耶穌進入我們當中！成陣咖喱魷魚味，送聖體員都怕咗你喇！ 

孫仔： 既然爺爺咁堅持，咁數足59分59秒再多1秒守齋喇。

爺爺： 呢一個鐘係俾大家安頓個心。吓吓同耶穌計到盡，咁就冇咗守聖體齋嗰份發自內心嘅犧牲精神㗎喇。望完彌撒，我先去飲茶嘆番一盅兩件，食埋籠鵪鶉蛋燒賣㖭。

孫仔： 咁高膽固醇，一個人點可以食晒成籠？我陪你守聖體齋、望彌撒再陪你飲茶更幫你食埋一件點心喇！ 

  
捐款支持公教報  http://kkp.org.hk/donation