【教友有問題】點解會有「為中國教會祈禱日」？

孫仔： 爺爺，你不斷「想當年」：講傳教士點樣喺大陸幫太公領洗、太公又點樣為全村教道理。我聽到夠料同你哋出書囉。

爺爺： 我哋好難得先四代信天主教㗎，點可以忘記呢段歷史呢？ 

孫仔： 爺爺，太公最後咪又落嚟香港，而你又喺香港出世，風光嘢俾你同我回味罷喇。我都想關心吓中國教會，但唔知有咩機會呢。

爺爺： 爺爺唔係要你記太公有幾風光，而係想你學佢對教會咁忠心！我哋梗係有機會關心中國教會喇！本篤十六世喺2007 年向中國教會發表牧函，將5月24日聖母進教之佑瞻禮定做「為中國教會祈禱日」，呼籲普世教會喺嗰日同中國嘅教會一齊祈禱。你爺爺我，年年都為中國教會健康成長去祈禱㗎。

孫仔： 爺爺，5月24日咪係你同太公去上海佘山朝聖嘅紀念日囉？ 

爺爺： 每年聖母月，來自四方八面嘅教友都會去佘山聖母進教之佑大殿朝聖。而家喺為中國教會祈禱日，大家都會祈求聖母進教之佑去保守中國教會，令我諗起上一代嗰份熱誠，今天都仲喺度！疫情過咗之後，我再帶你去朝聖喇。

孫仔： 今年返唔到去，不如嗰日我陪你唸玫瑰經，一齊為太公、幫助我哋屋企嘅傳教士，同埋中國教會祈禱喇。

  
捐款支持公教報  http://kkp.org.hk/donation