【教友有問題】乜嘢係「聖神七恩」？

細佬： 哥哥，條馬路熱到可以煎蛋喇！今日都係留番喺屋企歎住冷氣參加網上彌撒，無謂搞到成身汗，臭親啲教友呢。

哥哥： 你剛剛領咗堅振，咁快就偷懶？怕臭可以帶衫去換。我哋喺堅振禮嗰陣，同時領受咗「聖神七恩」，而其中一恩「剛毅」，就係等我哋堅持做正確嘅事！ 

細佬： 聖神有邊七恩呀？唔覺主日學有教喎！係咪老一輩嘅傳統咋？ 

哥哥： 肯定只係你上堂冇留心聽咋 ！呢七恩分別係「上智」：用信仰眼光睇嘢；「聰敏」：理解信仰真理；「超見」：明辨事理；「剛毅」堅持做正確嘅事；「明達」：辨別善惡；「孝愛」：愛慕天主；「敬畏天主」：服從天主。

細佬： 哥哥，我都有「超見」喎！熱到咁梗係唔出街喇！ 

哥哥： 堂區啲長者教友都「上智」過你呀！你再唔返，啲同學實笑你唔「剛毅」喇！ 

細佬： 我都不知幾「聰敏」！一早起咗身。如果唔係你晏起身，搞到我哋去唔到9點半，又駛乜等到11點喎？哥哥，記住「敬畏」之恩呀。

哥哥： 聖神嘅恩寵係豐厚同多元嘅，等你哥哥我教番你咩叫「孝愛」喇 ！ 

  
捐款支持公教報  http://kkp.org.hk/donation