【教友有問題】死後可以捐贈器官嗎？

阿爸： 阿仔，呢張係我嘅「器官捐贈」卡，第日我有乜依郁，你揸住張卡同醫生交代喇！ 

阿仔： 阿爸，我唔准你亂講！呢啲第日先諗喇 ！ 

阿爸： 可惜病人唔等得呢！早幾年我老友個仔心臟衰竭，佢地兩夫婦每日望住個電話，等醫院通知換心，但最後都等唔到！世侄嗰時同你一樣都係讀緊大學，但最後畢唔到業⋯⋯之後我哋幾個老友都填咗器官捐贈卡，希望唔好再有病人父母失望囉。

阿仔： 阿爸，我知你好心地，但會唔會有違信仰㗎？ 

阿爸： 如果直接引致人傷殘或者死咗，咁喺道德上當然唔可以接受喇，不過死後自願捐贈器官係高尚嘅行為，絕對值得鼓勵！（參教理2296╱參《生命的福音》通諭86）。

阿仔： 阿爸，我哋一齊為病人家庭祈禱，捐贈者同被捐贈者嘅家屬都好大壓力呀。

阿爸： 好，我地一齊祈禱。將來醫生問起你，你記得勇敢啲講番爸爸嘅心意出嚟呀！ 

  
捐款支持公教報  http://kkp.org.hk/donation