【教友有問題】教會睇唔起女性？

代仔 : 代父，教會成日話唔夠神父，如果女仔都可以做神父，咁係咪會解決神父短缺嘅問題？ 

代父： 唔得㗎！只有男性先可以做神父㗎！ 

代仔 : 點解呀？唔通教會認為男性優勝過女性，所以神父呢啲職位先可以俾男性做？ 

代父 : 絕對唔係，性別同教會入面嘅職務無關係！我問兩條問題你就明，耶穌揾咗咩人去管治教會？12人中包唔包括聖母瑪利亞吖？ 

代仔： ⋯⋯12位都係弟子（路六13-16）⋯⋯唔包括聖母呀。

代父： 唔包括聖母，咁係咪代表12位宗徒優勝過聖母瑪利亞先？ 

代仔： 當然唔可以咁講！天主造人，就造了男和女，兩者都喺按天主肖像而造，男女一齊要生育繁殖，治理大地。（參創一27-28）。主耶穌嘅救贖工程，都係始於瑪利亞嘅自願合作。冇咗聖母嘅無私參與，天主就唔會降生成為基督，十字架上嘅救贖大業，就唔能夠完成喇（天主教教理492）⋯⋯ 

代父： 咪係 ！聖母瑪利亞嘅母親角色，關係到整個人類嘅得救。同樣喺今日，如果冇媽媽，就唔會有主教、神父、執事啦。 

當然，教會都明白喺促進婦女角色嘅事情上，仲有好多嘢可以做，所以教宗近年都喺教廷決策同管理方面，任命多咗婦女參與。

代仔 : 咁我明啦！所以喺天主眼中男女都係平等，只係角色上有所差異。（天主教教理369） 

  
捐款支持公教報  http://kkp.org.hk/donation