【教友有問題】為乜要搞寵物祝福？

阿女：媽咪，堂區話過兩個星期，會有寵物祝福禮，其實乜嘢係寵物祝福呢？如果我帶隻倉鼠仔俾神父祝福，係咪會長命啲㗎？我唔想再見到啲倉鼠仔離開我呀！ 

阿媽：小動物都係天主所愛嘅受造物，祝福儀式唔係要幫倉鼠添壽祈福，而係去感謝天主創造咗萬事萬物，同埋鼓勵教友去愛護受造物呢。

阿女：媽咪，你同老竇結婚10周年嗰陣，都俾神父祝福你哋一生一世喇。我都希望倉鼠仔同主人可以一生一世呀。

阿媽：動物都有壽數，但係令動物無故咁受罪，或者蹧蹋佢哋嘅生命，都唔合乎人性尊嚴嘅。我哋可以愛護動物，但唔應該將專屬於人的情懷，去轉移到動物身上。 （參教理2418） 

9月係「關愛受造界時期」，不如你都趁機會去鼓勵同學仔去愛護小動物喇。我哋分享天主嗰份愛，可以令倉鼠啲同類過得更幸福呢。

阿女：媽咪！你講到愛護動物咁合乎信仰，不如俾我領養多幾隻倉鼠仔喇！ 

阿媽：其實倉鼠想靜吓，你有時間就多啲祈禱同溫書喇。

  
捐款支持公教報  http://kkp.org.hk/donation