【教友有問題】點解用少啲塑膠 都係愛德行為？

阿爸：阿仔，唔好洗啲膠盒去重用喇！即棄餐具係預咗俾你掉㗎。

阿仔：阿爸，疫情之下，我哋已經被迫用多咗好多外賣盒㗎喇，加加埋埋分分鐘疊到十幾層樓咁高！當係為咗保護天主嘅創造，從生活細節實踐愛德喇。

阿爸：行善工同愛護受造物就話有愛啫，珍惜塑膠點稱得上係愛德行為呀？ 

阿仔：阿爸，如果你當地球係一個家，就好自然會愛佢㗎喇。每年全球有800萬噸塑膠垃圾被掉咗落海，教宗方濟各都勸大家唔好亂扔膠入海呀。 

保護環境係要靠生活中每個微小舉動，避免用塑膠等物品，可以反映出人嘅慷慨同創意，展現人最珍貴嘅一面，而且重複使用物件，而唔係隨手扔掉，更係彰顯人自尊嘅愛德行為呢。（參《願祢受讚頌》通諭 211） 

阿爸：唔怪得就算係疫情之前，次次堂區聚餐，我見你阿媽同堂區教友都自備餐具喇。

阿仔：阿爸，唔見你用阿媽送嗰套餐具嘅？你係咪掉咗呀？ 

阿爸：冇掉，不過都冇用過。而家去搵番出嚟用囉。

  
捐款支持公教報  http://kkp.org.hk/donation