【教友有問題】乜嘢係玫瑰經奧蹟？

阿仔： 媽咪！而家係10月玫瑰月，主日學導師教咗我哋唸玫瑰經呀，聖母媽媽一定讚我叻仔啫！ 

媽咪： 咁不如等我幫聖母媽媽考吓你先。唸俾聖母媽媽聽之前，唸俾媽咪聽先吖？ 

阿仔： 我⋯⋯我識唸哂聖母經同天主經㗎！萬福瑪利亞，主與你⋯⋯ 

媽咪： 你好似未識唸聖母經喎。今期《公教報》第13版有《玫瑰經》抄經，你抄一次俾媽咪睇喇。

阿仔： 我抄多幾次就背到㗎喇！只係我唔記得啲奧蹟啫。其實玫瑰經奧蹟係講咩㗎？ 

媽咪： 唸玫瑰經，就係同聖母一齊默想基督嘅奧蹟，奧蹟帶出咗福音嘅綱要。你將主日學聽番嚟嘅福音故事串連埋，內容同各個奧蹟好近㗎喇！ 

阿仔： 奧蹟好似各有重點喎！ 

媽咪： 算你喇，都記到少少導師講咩。「歡喜奧蹟」默想耶穌和聖母生命中值得歡喜的事件；「痛苦奧蹟」以耶穌受難事蹟做中心；「榮福奧蹟」俾我們諗起耶穌同聖母光榮顯示喺世人面前嘅時刻。後嚟聖教宗若望保祿二世加嘅「光明五端」，就係講耶穌公開傳教的事蹟，令到玫瑰經呢個福音綱要更加圓滿呢！ 

阿仔： 爸爸仲未放工，得我哋兩個唸玫瑰經好似好清靜喎！ 

媽咪： 咁不如媽咪今晚9點半開手機，聽住「公教頻道」（https://www.facebook.com/catholicway）嘅哥哥姐姐喺玫瑰月帶我哋唸喇！ 

  
捐款支持公教報  http://kkp.org.hk/donation