【教友有問題】點解聖母會係「中保」？

阿仔： 媽咪！睇完「公教頻道」啲哥哥姐姐唸《玫瑰經》，我終於學識哂喇！等我多啲為搬咗去安老院嘅婆婆祈禱先，我好耐冇見過隔離屋個婆婆喇！好想再聽佢講福音故仔呀！ 

阿媽： 乖仔！喺玫瑰月多啲唸《玫瑰經》，聖母媽媽會幫我哋話俾天主聽㗎！ 

阿仔： 媽咪，我想問好耐：既然想天主聽我禱告，點解唔直接唸天主經呢？ 

阿媽： 《玫瑰經》入面都有《天主經》㗎，而聖母更加係天人之間嘅中保嚟㗎。

阿仔： 點解聖母會係「中保」呢？ 

阿媽： 因為聖母全面配合基督嘅救贖世人嘅工作，而令佢同基督一齊享有中保嘅地位。聖母升天之後，佢喺救恩入面嘅角色從未中止過，佢一再轉求，繼續為我哋獲取永生嘅恩惠。（參教理969）《玫瑰經》入面嘅奧蹟默想內容，正係聖母參與基督救贖工程嘅經歷呢。

阿仔： 乜唔係耶穌基督先係中保呢？ 

阿媽： 天人之間嘅中保係耶穌基督，聖母都係，不過，聖母係憑住母親嘅地位喺教會做恩寵嘅中介。而梵二《教會憲章》都講過，聖母分享呢個角色，無損基督作為中保嘅尊嚴與能力。

阿仔： 媽咪，係咪好似之前你勸外公唔好食肥膩嘢嗰陣，外婆幫口咁呢？ 

阿媽： 有啲似喇，不過唸經唔係要求或苛索天主，係同天主嘅溝通。

  
捐款支持公教報  http://kkp.org.hk/donation