【教友有問題】點解唸珠有五隻顏色？

阿妹： 家姐，玫瑰月就快完喇，等我揀條最靚嘅唸珠出嚟唸多啲玫瑰經先。咦！點解呢條會有五隻顏色㗎？ 

家姐： 呢條叫做「福傳玫瑰唸珠」，係俾我哋為各地福傳工作祈禱㗎，係咪好靚呢？呢款唸珠由五種顏色組成，分別代表五大洲、白色係歐洲、紅色係美洲、藍色係大洋洲、綠色係非洲，而黃色就係亞洲。

阿妹： 咁點解會有呢款唸珠呢？唔通係限量特別版？ 

家姐： 唔係限量，不過就真係特別為咗福傳而設喇。話說1951年，宗座傳信善會嘅美國地區負責人施恩總主教（Fulton J. Sheen）希望鼓勵教友為全球福傳工作祈禱，於是推出咗「福傳玫瑰經」，仲設計咗呢款唸珠去配合呢！ 

阿妹： 福傳玫瑰經點樣唸㗎？ 

家姐： 同唸玫瑰經一樣，只需要喺奧蹟嘅默想內容加入福傳祈禱意向同反省就得㗎喇；而當你唸到唸珠上面嗰隻顏色，就可以為相應地區祈禱呢。 

阿妹： 傳教士唔怕離鄉別井，嚟香港服務我哋，我都想多啲為海外福傳祈禱呢。

家姐： 一於今個主日下晝兩點半，去堅道主教座堂參加傳教節慶典，或到時上網（https://www.facebook.com/MissionSundayHK/）一齊為傳教意向祈禱喇！

  
捐款支持公教報  http://kkp.org.hk/donation