【教友有問題】點樣求聖人轉禱？

細佬： 阿哥，返學好大壓力呀！Zoom 咗成年咁耐，我跟得好辛苦呀！係咪每日唸《聖若瑟年禱文》，我就會好似聖若瑟咁堅強㗎喇？ 

阿哥： 細佬，有壓力就即管同我講，千祈唔好自己鬱住呀！你叻仔，識得主動求聖人幫手，方向正確但未夠呢。

細佬： 仲未夠？我唔單止唸禱文，仲有託聖若瑟向耶穌祈禱，更應承佢會努力喎！ 

阿哥： 今年係聖若瑟年，求佢轉禱當然好，但不妨都學習一啲曾經同你面對相同處境嘅聖人，默想佢哋嘅芳表同埋名言，嘗試代入佢哋嘅處境，體會到佢哋成聖嘅方式，再細心諗吓對你自己有咩參考意義呢。

細佬： 等我諗清楚自己有咩願望，再求番嗰幾位聖人先！ 

阿哥： 既然聖多瑪斯係學生主保，你都可以請佢為你代禱㗎。不過，你唔單只要為自己，仲要為同學仔代禱呢，好多學生哥同你一樣咁適應緊㗎！ 

細佬： 阿哥你講中我心聲呀。前幾日去天主教墳場探爺爺嫲嫲，見到墳場工友已經修理好打風嗰陣爛咗嘅地方喇。我都想為佢哋祈禱、多謝佢哋呢！ 

阿哥： 今期《喜樂少年》第4頁介紹墳場同墳場工人嘅主保，我哋一齊揭去嗰頁學吓聖人嘅信德喇！要記住，爺爺嫲嫲都一直為你祈禱㗎，唔好灰心呀細佬！ 

  
捐款支持公教報  http://kkp.org.hk/donation