【教友有問題】點樣喺煉靈月追思已亡教友?

期數
4056
刊登日期
2021.11.12
作者
阿公
主曆
主曆 2021 年 11 月 14 日 常年期第卅三主日

阿信: 堂區聖詠團團長上星期過咗身,佢咁用心為我哋領唱,可惜我已經冇機會多謝佢。不如我哋請神父為佢獻一台彌撒喇!橫掂都係,不如 獻多台俾上年過身嘅堂區工友好唔好呢? 

阿德: 當有教友過身,我哋最好快啲請神父為佢奉獻追思彌撒。喺煉靈月入面,與其隨意自己揀代禱對象,倒不如為堂區所有已亡教友祈禱喇! 

阿信: 我好難識哂所有已亡教友喎!點樣去追思佢哋呢? 

阿德: 好多聖堂都設有「追思閣」或「先賢閣」,裡面有本「亡者名冊」或祈禱牆,上面紀錄咗先人嘅姓名,俾信徒代禱㗎。

阿信: 其實教友過身之後,其他人未必知道,名冊真係幫到我哋去關心呢啲家庭呢。我哋應該多啲去追思閣為佢哋唸玫瑰經喇! 

阿德: 煉靈月入面,部份堂區會放多本簿冊,俾教友去寫低需要代禱嘅先人姓名,然後由神父為佢哋奉獻一台追思彌撒㗎! 

阿信: 我仲想為更多先人奉獻追思彌撒,應該點做呢? 

阿德: 你不如參與煉靈月入面嘅追思彌撒,同埋請相關善會為佢哋祈禱喇!我相信佢哋一定收到你份心意! 

 

 

 

  
捐款支持公教報  http://kkp.org.hk/donation

廣告