【教友有問題】「基督君王節」慶祝啲咩？

孫女： 嫲嫲，今個主日嘅「基督君王節」慶祝啲咩㗎？我哋唔係日日都向耶穌基督祈禱咩！ 

嫲嫲： 教會想提醒我哋去慶祝基督救世工程圓滿成功，兼且基督同嘅忠實信徒一齊獲得最後勝利呢。

孫女： 有仗打咩？點解要勝利？ 

嫲嫲： 呢個瞻禮真係同打仗有關㗎！喺1925年，教宗庇護11世見到世俗主義盛行，戰事四起，於是訂每年10月最後一個主日做「耶穌基督君王瞻禮」，希望人人尊崇基督為王、得享和平幸福。到咗1970年，教宗保祿六世將呢個瞻禮改喺常年期最後一個主日。我哋要藉住呢個瞻禮，公開承認自己信服耶穌係我哋救主呢。

孫女： 公開承認？呀，我記得之前有聖體出遊呢！ 

嫲嫲： 以前嘅基督君王節聖體出遊不知幾墟冚，啲街坊不知幾歡喜，連報紙都會報導㗎！ 

孫女： 今年有疫情，都係靜靜過喇。

嫲嫲： 不過，有堂區青年話俾我知，喺今年起，教區層級嘅「普世青年節」改喺基督君王節舉行。最近唔少青年輕生，我個心不知幾痛！乖孫，嗰日我哋全家一齊為青年祈禱喇！ 

孫女： 好呀嫲嫲。今期公教報中間大頁有基督君王海報半年曆，我幫你貼喺屋企祈禱閣去默想喇！ 

  
捐款支持公教報  http://kkp.org.hk/donation