【教友有問題】點解要擺「將臨環」？

阿仔： 媽咪！我唔記得向堂區報名，喺彌撒入面燃點將臨環，今年冇得威㖭 ！ 

阿媽： 將臨期係要悔罪刻苦，迎接主基督降生，唔係俾你攞彩㗎！你快啲去溫習主日學教嘅將臨期各主日嘅主題喇。

阿仔： 我知將臨期四個主日各有唔同主題，依次係醒寤、悔改、喜樂，同埋「厄瑪奴耳」——天主與我們同在；每個主日燃點一支蠟燭，表示基督就快嚟到。不過，點解要整將臨環？擺四支蠟燭咪得囉？ 

阿媽： 將臨環源於北歐嘅民間習俗，象徵喺日短夜長嘅冬天驅散黑暗，期待太陽快啲返嚟。之後，基督徒將象徵基督嘅光結合圓環，漸漸演變成而家嘅將臨環。

阿仔： 咁整個方形或排一行仲整齊喇！又可以好似馬槽咁，年年用番舊嗰套咪仲方便！ 

阿媽： 花環嘅圓形象徵天主嘅永恒，常青嘅樹枝象徵天主帶嚟嘅新生命，所以材料通常嚟自日常生活同環境，好似松樹咁。

阿仔： 疫情之下，聖堂難得開番彌撒，今年我一定要陪妹妹同細佬參加將臨期同聖誕期嘅禮儀！ 

阿媽： 阿仔，你揭去今期《喜樂少年》第6頁，跟住學整個將臨花環手工送俾佢哋，佢哋實聽哥哥話返聖堂呢！ 

  
捐款支持公教報  http://kkp.org.hk/donation