【教友有問題】座堂嘅主教座椅 有咩象徵意義？

阿仔： 爸爸，我上網睇晉牧禮，見到周守仁主教揸住支牧杖、企喺主教座椅前面好有型呀！座椅貼咗佢嘅牧徽呢，其實呢張櫈有咩象徵意義㗎？ 

阿爸： 主教座椅係主教以教區首牧身份，訓導教友，領導同團結大家，以及主持禮儀嘅地方，所以張櫈係主教職務嘅有形標記嚟。

阿仔： 其他神職人員可唔可以坐上去呢？ 

阿爸： 除咗周主教本人之外，其他人係唔應該坐㗎！顧名思義，主教座堂就係「主教座位」所在嘅聖堂喇。主教喺祭台上主持彌撒，等大家喺基督內團結合一。

阿仔： 我仲見到周主教拎住支牧杖呢，我知！主教先可以拎嘛！ 

阿爸： 牧杖代表主教嘅地位同牧民職責，佢可以喺主持禮儀嗰陣用牧杖，但同時要戴禮冠。

阿仔： 有咗新主教，咁神父主持彌撒嗰陣，就要喺感恩經度帶領我哋為主教祈禱喇！ 

阿爸： 阿仔，我哋要多啲為周守仁主教祈禱，多啲為教會祈禱呀！ 

  
捐款支持公教報  http://kkp.org.hk/donation