【教友有問題】領洗「浸洗」就好？

老婆：老公，今日嘅「主受洗節」紀念耶穌接受若翰嘅洗禮。佢喺約旦河浸洗咁隆重，第時到咗復活節，我要喺洗禮池領洗㗎！ 

老公：我哋堂區冇洗禮池喎！如疫情持續，我擔心都好難浸洗囉。

老婆：好似用浸洗方式好啲喎，一生人一次，梗係要做到最好喇！ 

老公：按禮規，洗禮要選用浸洗式或倒水式，其中浸洗可以更恰當去表達我哋參與基督嘅死亡同復活（參《基督徒入門聖事總論》22 條）。浸喺水入面，三次沒頂，嗰種由死入生嘅過程，可以令人更深刻咁經驗信仰呢。 

不過，兩種洗禮方式同樣有效，浸唔到唔係咩遺憾，相反，疫情下嘅領受入門聖事方式，係你呢幾屆新教友嘅特別經歷呢。

老婆：第日阿仔阿女領洗，我要俾佢哋浸洗㗎！一於揀去有大聖洗池嘅堂區喇！ 

老公：有啲堂區喺舉行入門聖事嗰陣，會搭建臨時浸洗池。老婆，雖然我領咗洗，但今次為咗陪你而再慕道，係想你知道，基督徒喺信仰上有同行者會好好多。無論浸洗抑或倒水，嗰份恩寵、慕道者之間嘅友誼，都會陪你一世㗎。

老婆：好喇！我勤力啲溫習，等慕道團導師知道你係我信仰路上嘅最佳同伴喇！ 

  
捐款支持公教報  http://kkp.org.hk/donation