【教友有問題】有病求「露德聖母」醫好 ？

阿仔： 阿媽救命！我一次過食咗半底年糕，個胃開始頂住痛呀！ 

阿媽： 阿仔覺得點呀？做人要對自己身體負責任，先對得住天主㗎。雖然新年流流搞到要睇醫生，不過阿媽會陪實你嘅。

阿仔： 阿媽，有病係咪要求露德聖母醫番好？嚟緊2月11日係露德聖母瞻禮，你咪有支露德聖水囉，趁機會求聖母媽媽醫我個胃喇！。

阿媽： 阿仔，我未飲過露德泉水，唔知效果。淨係知道聖母1858年喺法國露德顯現俾伯爾納德嗰陣，主要提醒我哋唸玫瑰經、悔改同補贖、喺露德起聖堂，同埋要確信聖母無染原罪。 

想善度瞻禮，就應該效法主保嘅聖德。露德聖母係病人主保，聖若望保祿二世將露德聖母瞻禮定為「世界病人日」， 希望病人喺聖母轉禱下得到安慰。你似乎只係食滯咗啫，不如轉為替住院病人祈禱喇！而家唔方便探病，好多病人都要孤零零過年呢。

阿仔： 阿媽好對唔住，我唔會咁為食㗎喇。當我諗到病人連糕都冇得食，就想聖母媽媽安慰佢哋一家呢。

阿媽： 你識悔改就好！同我聽日食粥俾個胃休息下。疫情過咗之後，跟堂區義工去醫院探病喇。

  
捐款支持公教報  http://kkp.org.hk/donation