【教友有問題】返唔到聖堂辦告解點算？

男朋友： 新型冠狀病毒疫情愈來愈嚴重，而家聖堂被迫關閉，辦唔到告解點算？ 

女朋友： 你係咪做咗啲對唔住我嘅事？講呀！點解無喇喇要辦告解！ 

男朋友： 四旬期係悔改更新嘅時刻，我哋要辦妥告解，勤拜苦路，咁先至容易親近天主㗎。

女朋友： 早啲講吖！教友要辦告解，可以聯絡堂區神父，作適當牧民安排。

男朋友： 我近排有兩聲咳，怕傳染神父喎！可唔可以用 WhatsApp 辦告解呢？ 

女朋友： 辦告解係聖事，要親身向神父告明自己嘅罪，正如傅油都唔可以隔住個 mon 啦。喺疫情下第一個四旬期，教宗方濟各鼓勵辦唔到告解嘅教友，直接向天主懺悔，將憂苦交俾佢呢。 

我哋可以發「上等痛悔」，立志棄絕罪惡，應承唔再犯罪。上等痛悔係可以赦罪㗎。

男朋友： 咁我以後唔駛辦告解，自己發上等痛悔都得喇！ 

女朋友： 咁又唔得喎！教友要定期辦告解㗎！好似我哋拍拖咁，都要成日見面喇。我哋喺四旬期雖然返唔到聖堂辦告解同拜苦路，我哋都可以喺屋企做苦路默想㗎，快啲打開公教報中間大頁，默想疫情下嘅苦路，為烏克蘭嘅和平祈禱喇 ！ 

  
捐款支持公教報  http://kkp.org.hk/donation