【教友有問題】食少啲就等於守齋？ 

阿女： 阿媽，我決定喺四旬期守齋呀！逢星期五唔駛煮我飯，我食個減肥代餐就夠喇，反正疫情下出唔到街食好嘢，就等我遵守教會規矩喇！ 

阿媽： 阿女，教會鼓勵我哋全年逢星期五守齋㗎，你而家只係「被動配合」守齋，已經冇咗守齋應有嗰份克己同愛心囉！ 

阿女： 我已經好克制咁食少啲嘢，仲唔算守齋？ 

阿媽： 守齋要積極克己，敢於犧牲，慷慨分享，你細個都識慳慳埋埋自己啲零用錢，捐俾四旬期基金，透過堂區同善會去幫助有需要嘅人！雖然而家聖堂唔可以開門，但佢哋喺門外擺放咗四旬期捐獻箱俾教友分享愛心㗎。

阿女： 阿媽，疫情之下人人生活艱難，捐錢呢個提議唔錯喎！ 

阿媽： 四旬期唔係淨係捐錢，仲要拜苦路，默想基督嘅苦難，喺窮人身上服侍基督，我哋啱啱買咗幾排雞蛋，不如你拎半打俾樓下A座嗰位教友婆婆喇，佢一個人住，年紀大又唔方便出街，我哋四旬期要守望相助呢。

阿女： 坐言起行，我即刻送去俾婆婆喇！ 

阿媽：婆婆好似冇智能手機，不如你拎埋份堂區通訊同公教報俾佢，等佢有番啲靈修滋養喇。

  
捐款支持公教報  http://kkp.org.hk/donation