【教友有問題】「復活期」係咩嚟? 

期數
4078
刊登日期
2022.04.14
作者
阿公
主曆
主曆 2022 年 04 月 17 日 耶穌復活主日

老公: 老婆,復活節話咁快就完,終於唔駛守齋克己喇! 

老婆: 你錯喇!雖然香港教區寬免咗星期五守齋嘅規定,但鼓勵教友喺當日克己節制,或者協助有需要嘅人。而且,我哋喺「復活期」仍要繼續慶祝耶穌基督嘅光榮復活。

老公: 「復活期」係咩嚟?呢個節期維持幾耐㗎? 

老婆: 「復活期」係由復活主日當日起計,總共50日,涵蓋七個主日,到五旬節先至結束。 

教會喺呢段時期慶祝基督嘅救世工程,同時紀念耶穌嘅苦難、死亡、復活、升天同埋聖神降臨,其間亦係新教友穩住信仰嘅「釋奧期」。神父嘅祭披係金色或者白色。

老公: 候洗者都未領洗,仲駛乜「釋奧期」呢? 

老婆: 堂區可以延長新教友嘅「釋奧期」㗎嘛!「釋奧期」係指解釋奧蹟嘅時期,幫助新教友加深體驗自己所接受嘅奧蹟(聖事),更密切咁進入信友團體,教友要喺呢段時間好好歡迎新教友,幫佢哋融入堂區,多啲關心佢哋,同鼓勵佢哋加入善會。代父母嘅責任更大!最好陪代仔代女一齊望彌撒,支援佢哋嘅信仰。

老公: 講開又講,我都好耐冇搵我代仔囉! 

老婆: 快啲搵番佢喇。遲啲聖堂開返,記住陪佢參加堂區活動呀! 

 

 

 

 

  
捐款支持公教報  http://kkp.org.hk/donation

廣告