【教友有問題】點樣進行「救主慈悲」敬禮？

表甥女： 表舅父！教會喺今日慶祝「救主慈悲主日」，我哋要進行啲咩敬禮㗎？係咪唸吓經、履行善工就得㗎喇？ 

表舅父： 除咗參加彌撒同唸「慈悲串經」之外，我哋要誠懇痛悔自己嘅罪過、辦告解同領聖體；恭敬救主慈悲聖像畫——畫中紅光代表血，白光代表水，描繪咗天主藉住基督復活嘅奧蹟，圓滿咁展示佢嘅仁慈；用慈悲嘅心對待每個人。 

有人喺聖週五展開「九日敬禮」，為唔同意向祈禱，堅固自己嘅信、望、愛三德。

表甥女： 我想為爸爸媽媽祈禱呀，我之前感染咗新型冠狀病毒，發咗幾日燒，佢哋照顧我嘅起居，仲坐喺床邊為我唸玫瑰經，求天主醫好我呢。 

「慈悲串經」同唔同玫瑰經㗎？駛唔駛另外買唸珠呢？ 

表舅父： 「慈悲串經」同玫瑰經結構差唔多，我哋可以用玫瑰唸珠。每日下晝三點係「慈悲時刻」，教友可以喺當刻誦念串經，作為我哋同普世罪過嘅補贖。

表甥女： 我都想為表舅父你祈禱呀！表舅母話你成日好惡死，我想求天主令你溫柔啲囉！ 

表舅父： （尷尬表情）⋯⋯你啱 ！我哋要學習慈悲待人侍主嘅。

「慈悲串經」參教區禮儀委員會網站資料： 
http://catholic-dlc.org.hk/2013DivineMercy.pdf 

• 本專欄告一段落，感謝作者多年來為公教報撰文。全新專欄「沿途有祢」由林祖明神父執筆，5月首主日上架。——編者

  
捐款支持公教報  http://kkp.org.hk/donation