【明愛】如你愛我， 就會對我好

「姑娘，我覺得我另一半好自私，總係唔會主動對我好，我已經為咗呢頭家、為呢個人做咗好多，但佢都唔珍惜我⋯⋯ 我後悔嫁咗呢個人⋯⋯」眼前的女人一直不斷訴說丈夫的不是，及她在這段關係中的委屈感受和傷心經歷。

「你經歷咗咁多委屈同傷心，丈夫知唔知？」我問。

「我覺得佢唔知囉，就算知佢都唔會理我，佢從來唔會主動關心我囉⋯我睇咗好多網上文章，好多都話一個男人如果愛一個女人係會主動關心對方，心裡面有你嘅人先會願意去照顧你嘅情緒、著緊你⋯」太太繼續細說她對先生的不滿及失望。

「咁你有冇表達過俾佢知道？」我繼續問。

「我有試過表達啊⋯佢都無動於衷⋯佢咪繼續自己顧自己⋯愛呢樣嘢，用心嘅根本唔使要講先識做！」 太太無奈地說。

「你試過點樣同佢表達啊？你介唔介意試吓講返之前點樣同佢傾㗎？」我邀請她仔細描述當中的情形。

「我試過大家一齊睇電視嘅時候，我同佢講：『嗱，你要做一個好老公好爸爸，知唔知呀？』嗰時對方點頭，之後咪都係冇變過！」她回答。

「你之後就停咗？定你繼續講更加多你嘅感受？」我邀請她仔細回想。

「冇啊，咁都唔夠呀？我已經講咗內心嘅說話⋯⋯」太太表示詫異。

「你感覺佢係變咗定係佢一直都係咁樣？」我再進一步了解太太眼中的先生的狀況。

太太猶豫一會後回答：「其實佢不嬲都差唔多⋯之前有人直接同佢講佢先明⋯見佢同屋企人相處都係好離身，拍拖初時都好啲，都有計傾，但結咗婚生咗仔之後就真係冇咩⋯佢好似成日都睇唔到我啲情緒，次次都係等我自己處理完佢先再同我講返嘢，呢個男人淨係會做我講嘅嘢，唔會主動再做更多！」

「太太，我可唔可以咁講，人如果愛一個人，佢應該會知道對方嘅需要同主動關心佢， 你係咪好認同呀？」我問太太。

「係呀，如果一段感情，淪落到女人去教男人要點樣愛佢，呢段感情注定失敗。」太太點頭。

後來我跟先生單獨面談，對於太太的內心狀況，他聽後表示愕然，像是第一次知道的。先生表示其實他有時也洞悉到太太的不開心，也嘗試主動關心問候，但換來一次又一次板著臉回應。先生以為太太需要的是空間，所以他盡量不作聲，不添加太太壓力。這在太太的眼中卻是不作為。先生以為太太的不開心主要是因為管教兒子，殊不知自己才是主因。先生默默做了很多家中的工作，嘗試減輕太太負擔，甚至當面對太太不知甚麼時候會引爆的「炸彈」時，對於充滿無力感的先生來說，他認為保持一個距離去愛對方，可能才是他在關係中覺得最安全的處理方法。

每個人對愛的表達及接收都很不同，原來人真的需要學習怎樣去愛另一半。有人可能在成長經歷中從來沒有得到被愛的感覺，亦沒有人教導怎樣去愛。亦有人以為自己懂得愛另一半，後來才發現一直只是在用自己以往感受愛的方式去愛對方，並非真的回應對方需要。

如果這位先生願意去明白太太的需要而學習怎樣去表達愛，並在行動上付諸實行，你覺得這段感情算不算成功？

• 明愛家庭服務