教友有問題

【教友有問題】乜嘢係主保聖人?

刊登日期: 
2021.09.17
主曆: 
常年期第廿五主日

細佬:家姐,救我呀!我唔見咗份功課,老師話搵唔返就要重新做過 ! 

家姐:細佬,你除咗要反省吓自己點解咁大頭蝦之外,仲可以搵「失物主保」聖安多尼代禱呢。

細佬:家姐,聖安多尼唔係聖名咩?點解會係失物主保?到底乜嘢係「主保聖人」呢? 

家姐:聖人係基督徒嘅模範同代禱者(參教理828),我哋起聖名,以至聖堂、教會機構、善會尊奉主保聖人,其實都係鼓勵我哋效法主保聖人嘅芳表㗎。 

部份主保聖人喺某方面嘅轉禱特別有效果,多年嚟累積唔少恩寵同奇蹟㗎。相傳聖安多尼本聖詠書俾一個初學修士專登拎走咗,於是佢就向天主祈禱。點知個修士半路遇到怪物,嚇到心虛,就將本聖詠還番俾聖安多尼喇 ! 

作者: 
阿公

【教友有問題】點解用少啲塑膠 都係愛德行為?

刊登日期: 
2021.09.10
主曆: 
常年期第廿四主日

阿爸:阿仔,唔好洗啲膠盒去重用喇!即棄餐具係預咗俾你掉㗎。

阿仔:阿爸,疫情之下,我哋已經被迫用多咗好多外賣盒㗎喇,加加埋埋分分鐘疊到十幾層樓咁高!當係為咗保護天主嘅創造,從生活細節實踐愛德喇。

阿爸:行善工同愛護受造物就話有愛啫,珍惜塑膠點稱得上係愛德行為呀? 

阿仔:阿爸,如果你當地球係一個家,就好自然會愛佢㗎喇。每年全球有800萬噸塑膠垃圾被掉咗落海,教宗方濟各都勸大家唔好亂扔膠入海呀。 

保護環境係要靠生活中每個微小舉動,避免用塑膠等物品,可以反映出人嘅慷慨同創意,展現人最珍貴嘅一面,而且重複使用物件,而唔係隨手扔掉,更係彰顯人自尊嘅愛德行為呢。(參《願祢受讚頌》通諭 211) 

作者: 
阿公

【教友有問題】為乜要搞寵物祝福?

刊登日期: 
2021.09.03
主曆: 
常年期第廿三主日

阿女:媽咪,堂區話過兩個星期,會有寵物祝福禮,其實乜嘢係寵物祝福呢?如果我帶隻倉鼠仔俾神父祝福,係咪會長命啲㗎?我唔想再見到啲倉鼠仔離開我呀! 

阿媽:小動物都係天主所愛嘅受造物,祝福儀式唔係要幫倉鼠添壽祈福,而係去感謝天主創造咗萬事萬物,同埋鼓勵教友去愛護受造物呢。

阿女:媽咪,你同老竇結婚10周年嗰陣,都俾神父祝福你哋一生一世喇。我都希望倉鼠仔同主人可以一生一世呀。

阿媽:動物都有壽數,但係令動物無故咁受罪,或者蹧蹋佢哋嘅生命,都唔合乎人性尊嚴嘅。我哋可以愛護動物,但唔應該將專屬於人的情懷,去轉移到動物身上。 (參教理2418) 

作者: 
阿公

【教友有問題】堂區牧民議會有咩工作?

刊登日期: 
2021.08.27
主曆: 
常年期第廿二主日

阿仔: 堂區牧民議會選咗新一屆幹事喇!阿爸你上屆都係幹事喎,做咩今屆唔去選呀? 

阿爸: 咪又係幫手搞主保瞻禮同朝聖旅行!幫咗咁多年,等D後生嘅幫吓手喇。

阿仔: 阿爸,牧民議會唔係淨係做呢D㗎。好似喺疫情之下,生活艱難咗,於是牧民議會同神父一齊決定,將主保瞻禮聚餐改為大型愛德聚會。

阿爸: 雖然好多神父都好開明,但議會始㚵係諮詢組織,最緊要搵幾個叻嘅教友去幫手! 

阿仔: 阿爸,堂區其中一個作用係傳教,而堂區牧民議會就係要激發大家嘅傳教意願,去接觸每個人(參聖職訓有關「堂區更新」訓令100),走出堂區。議會幹事首先要用愛去建立團體同傳教,本身叻唔叻係其次。

作者: 
阿公

【教友有問題】四旬期以外都要守齋?

刊登日期: 
2021.08.20
主曆: 
常年期第廿一主日

娟姐: 今晚收工不如去鋸扒啦,公司附近開咗間新餐廳,加廿蚊送羅宋湯、彩色啫喱同紅豆冰,保證飽到上心口呀! 

阿廷: 咦,今日係星期五喎,我要守齋呀。

娟姐: 而家又唔係四旬期,點解仲要守齋呢?你要做補贖咩? 

阿廷: 唔係,其實唔止四旬期,每個星期五係記念耶穌受難嘅日子,就好似我哋喺主日慶祝耶穌復活一樣。守齋係表達同耶穌一齊受苦嘅心意,棄絕自己,為自己同其他人犯過嘅罪做補贖。(參法典1249-1251) 

娟姐: 但係教區唔係寬免咗我哋星期五守齋咩? 

作者: 
阿公

【教友有問題】喺聖堂播電影 收唔收得捐獻㗎?

刊登日期: 
2021.08.13
主曆: 
聖母蒙召升天節

仔仔: 今年暑假就完喇,咁就過咗,好悶呀。

爸爸:不過今年聖堂嘅暑期活動都好豐富呀,上星期咪睇咗套卡通片,搞笑之餘仲帶出愛嘅信息。

仔仔: 爸爸,上次睇完戲之後導師話大家可以自由捐獻支持聖堂呀。我都捐咗$10。

爸爸: 捐錢支持聖堂係應該嘅。不過電影欣賞會係堂區安排,所以唔駛俾版權費,如果收捐獻嘅話,會唔會侵犯版權㗎? 

媽媽: 堂區係屬於非牟利組織,主要宗旨係宣揚宗教。《版權條例》第76條提到,即使播電影收入場費,只要收益係俾堂區做宣揚宗教呢個目的,係唔算侵犯版權㗎。

爸爸: 哦,原來係咁,咦,阿仔,你正話講捐咗幾錢話?$10!咁少! 

作者: 
阿公

【教友有問題】喺聖堂播電影 有冇侵犯版權㗎?

刊登日期: 
2021.08.06
主曆: 
常年期第十九主日

爸爸:阿仔返嚟嗱,今日聖堂暑期活動有咩玩呀? 

仔仔:今日我地睇咗套好好笑嘅卡通片呀,有七個王子中咗魔法變咗做肥嘟嘟嘅小矮人,俾個靚公主錫先可以變番自己。跟住導師就講吓友情同愛情⋯⋯ 

爸爸:咦?喺聖堂播電影?會唔會侵犯版權㗎? 

媽媽:之前堂區慕道團搞電影欣賞會嗰時我都問過呢個問題,導師話根據《版權條例》第76條,以宣揚宗教為主要宗旨嘅非牟利組織播放電影作品,係唔屬於侵權嘅。

爸爸:哦,原來聖堂只要買隻正版碟返嚟播就得,真係唔講唔知添! 

 

 

 

作者: 
阿公

【教友有問題】聖經新舊約裡面係同一天主?

刊登日期: 
2021.07.30
主曆: 
常年期第十八主日

孫仔: 爺爺,我有個重大發現呀!就係爸爸嘅性格變咗好多呢,明明以前好嚴好惡,而家就好仁慈同愛心爆棚。

爺爺: 哈哈!佢幾時都咁愛你㗎!就好似天主愛我哋咁。

孫仔: 佢好似舊約同新約裡面嘅天主咁變咗性情呀!而家個「爸爸」分分鐘係假扮㗎! 

爺爺: 點會呢?好多人以為舊約同新約入面係兩個天主:一個鍾意罰人,一個凡事有愛。其實從來只有一個天主,新舊約係反映緊天主啟示,經歷咗兩個階段,舊約時代係啟示嘅最初階段,新約時代係啟示嘅完成階段。(參教理140) 

因為唔同階段嘅子民,價值觀同文明程度都唔一樣,所以天主採用咗唔同嘅溝通方式唧。

孫仔: 咁樣天主真係一個好好嘅爸爸同教育家啊。

作者: 
阿公

【教友有問題】祈禱係咪一定要唸經㗎?

刊登日期: 
2021.07.23
主曆: 
常年期第十七主日

修士: 妹妹早晨!你朝朝陪你婆婆望彌撒,仲陪佢留喺聖堂祈禱,好抵讚喎! 

妹妹: 多謝修士!我返主日學嗰陣都學過唸經,不過婆婆同啲老教友唸嘅經文,我好多都未聽過!點解會有咁多經文嘅? 

修士: 基督徒喺唔同年代,產生咗好多對聖母同聖人嘅敬禮同經文,有啲係嚟自聖經,有啲係聖人寫嘅禱詞。

妹妹: 係咪要背哂㗎? 

修士: 咁又唔洗嘅。呢啲經文係幫緊我哋去祈禱,同天主傾偈,同主耶穌做好朋友㗎。

妹妹: 修士,我唔知祈禱嗰時同天主講咩好呢。祈禱係咪一定要唸經㗎? 

作者: 
阿公

【教友有問題】點解「潔德」咁重要?

刊登日期: 
2021.07.16
主曆: 
常年期第十六主日

阿女: 阿媽,7月6日係聖女葛萊蒂(Mary Goretti) 紀念日,佢為咗保護自己貞潔而俾人殺咗。我係女仔,梗係明白佢嘅堅持喇。但係有啲人會覺得冇咗條命真係唔抵呢。

阿媽: 所以話,如果人冇咗潔德、控制唔到慾望,會幾咁恐怖!隔離陳太話見到你成日同個男仔一齊放學喎,做咩拍拖都唔話俾阿媽聽呀? 

阿女: 嗰個係球隊教練嚟,有其他同學一齊㗎。你係咪想講拍拖前要守貞,唔守就冇幸福呀?我真係有認真諗過做修女㗎。

阿媽: 潔德唔係修道人嘅專利,男女朋友、夫婦、獨身都要去守㗎。阿媽唔係唔俾你拍拖,只係想你成熟啲呢。

阿女: 你都係兜個圈想叫我小心啲男人嘛。俾規矩限住就會幸福咩? 

作者: 
阿公

Pages