教友有問題

【教友有問題】喺聖堂播電影 有冇侵犯版權㗎?

刊登日期: 
2021.08.06
主曆: 
常年期第十九主日

爸爸:阿仔返嚟嗱,今日聖堂暑期活動有咩玩呀? 

仔仔:今日我地睇咗套好好笑嘅卡通片呀,有七個王子中咗魔法變咗做肥嘟嘟嘅小矮人,俾個靚公主錫先可以變番自己。跟住導師就講吓友情同愛情⋯⋯ 

爸爸:咦?喺聖堂播電影?會唔會侵犯版權㗎? 

媽媽:之前堂區慕道團搞電影欣賞會嗰時我都問過呢個問題,導師話根據《版權條例》第76條,以宣揚宗教為主要宗旨嘅非牟利組織播放電影作品,係唔屬於侵權嘅。

爸爸:哦,原來聖堂只要買隻正版碟返嚟播就得,真係唔講唔知添! 

 

 

 

作者: 
阿公

【教友有問題】聖經新舊約裡面係同一天主?

刊登日期: 
2021.07.30
主曆: 
常年期第十八主日

孫仔: 爺爺,我有個重大發現呀!就係爸爸嘅性格變咗好多呢,明明以前好嚴好惡,而家就好仁慈同愛心爆棚。

爺爺: 哈哈!佢幾時都咁愛你㗎!就好似天主愛我哋咁。

孫仔: 佢好似舊約同新約裡面嘅天主咁變咗性情呀!而家個「爸爸」分分鐘係假扮㗎! 

爺爺: 點會呢?好多人以為舊約同新約入面係兩個天主:一個鍾意罰人,一個凡事有愛。其實從來只有一個天主,新舊約係反映緊天主啟示,經歷咗兩個階段,舊約時代係啟示嘅最初階段,新約時代係啟示嘅完成階段。(參教理140) 

因為唔同階段嘅子民,價值觀同文明程度都唔一樣,所以天主採用咗唔同嘅溝通方式唧。

孫仔: 咁樣天主真係一個好好嘅爸爸同教育家啊。

作者: 
阿公

【教友有問題】祈禱係咪一定要唸經㗎?

刊登日期: 
2021.07.23
主曆: 
常年期第十七主日

修士: 妹妹早晨!你朝朝陪你婆婆望彌撒,仲陪佢留喺聖堂祈禱,好抵讚喎! 

妹妹: 多謝修士!我返主日學嗰陣都學過唸經,不過婆婆同啲老教友唸嘅經文,我好多都未聽過!點解會有咁多經文嘅? 

修士: 基督徒喺唔同年代,產生咗好多對聖母同聖人嘅敬禮同經文,有啲係嚟自聖經,有啲係聖人寫嘅禱詞。

妹妹: 係咪要背哂㗎? 

修士: 咁又唔洗嘅。呢啲經文係幫緊我哋去祈禱,同天主傾偈,同主耶穌做好朋友㗎。

妹妹: 修士,我唔知祈禱嗰時同天主講咩好呢。祈禱係咪一定要唸經㗎? 

作者: 
阿公

【教友有問題】點解「潔德」咁重要?

刊登日期: 
2021.07.16
主曆: 
常年期第十六主日

阿女: 阿媽,7月6日係聖女葛萊蒂(Mary Goretti) 紀念日,佢為咗保護自己貞潔而俾人殺咗。我係女仔,梗係明白佢嘅堅持喇。但係有啲人會覺得冇咗條命真係唔抵呢。

阿媽: 所以話,如果人冇咗潔德、控制唔到慾望,會幾咁恐怖!隔離陳太話見到你成日同個男仔一齊放學喎,做咩拍拖都唔話俾阿媽聽呀? 

阿女: 嗰個係球隊教練嚟,有其他同學一齊㗎。你係咪想講拍拖前要守貞,唔守就冇幸福呀?我真係有認真諗過做修女㗎。

阿媽: 潔德唔係修道人嘅專利,男女朋友、夫婦、獨身都要去守㗎。阿媽唔係唔俾你拍拖,只係想你成熟啲呢。

阿女: 你都係兜個圈想叫我小心啲男人嘛。俾規矩限住就會幸福咩? 

作者: 
阿公

【教友有問題】每主日返聖堂?有心自己祈禱就得?

刊登日期: 
2021.07.09
主曆: 
常年期第十五主日

代父: 搬咗屋好耐冇見,近排返工忙唔忙呀? 

代仔: 好忙呀,我舊年搬咗之後轉埋工。平日好夜先放工,好多時週末都冇得休息。

代父: 搵食艱難⋯⋯咁你而加返邊間聖堂望彌撒呀? 

代仔: 搬遠咗,我都好耐冇返以前個間聖堂⋯⋯ 

代父: 香港咁多聖堂,主日彌撒時間選擇多,就啱時間,可以去就近另一間聖堂㗎⋯⋯ 

代仔: 放工咁攰,主日有時要OT,又要湊阿女,間中仲要陪阿媽飲茶⋯⋯唔緊要啦,天主咁仁慈,會體諒我嘅。

作者: 
阿公

【教友有問題】教會睇唔起女性?

刊登日期: 
2021.07.02
主曆: 
常年期第十四主日

代仔 : 代父,教會成日話唔夠神父,如果女仔都可以做神父,咁係咪會解決神父短缺嘅問題? 

代父: 唔得㗎!只有男性先可以做神父㗎! 

代仔 : 點解呀?唔通教會認為男性優勝過女性,所以神父呢啲職位先可以俾男性做? 

代父 : 絕對唔係,性別同教會入面嘅職務無關係!我問兩條問題你就明,耶穌揾咗咩人去管治教會?12人中包唔包括聖母瑪利亞吖? 

代仔: ⋯⋯12位都係弟子(路六13-16)⋯⋯唔包括聖母呀。

代父: 唔包括聖母,咁係咪代表12位宗徒優勝過聖母瑪利亞先? 

作者: 
阿公

【教友有問題】死後可以捐贈器官嗎?

刊登日期: 
2021.06.25
主曆: 
常年期第十三主日

阿爸: 阿仔,呢張係我嘅「器官捐贈」卡,第日我有乜依郁,你揸住張卡同醫生交代喇! 

阿仔: 阿爸,我唔准你亂講!呢啲第日先諗喇 ! 

阿爸: 可惜病人唔等得呢!早幾年我老友個仔心臟衰竭,佢地兩夫婦每日望住個電話,等醫院通知換心,但最後都等唔到!世侄嗰時同你一樣都係讀緊大學,但最後畢唔到業⋯⋯之後我哋幾個老友都填咗器官捐贈卡,希望唔好再有病人父母失望囉。

阿仔: 阿爸,我知你好心地,但會唔會有違信仰㗎? 

阿爸: 如果直接引致人傷殘或者死咗,咁喺道德上當然唔可以接受喇,不過死後自願捐贈器官係高尚嘅行為,絕對值得鼓勵!(參教理2296╱參《生命的福音》通諭86)。

作者: 
阿公

【教友有問題】乜嘢係「聖神九果」?

刊登日期: 
2021.06.18
主曆: 
常年期第十二主日

細佬: 哥哥,我報咗名入堂區輔祭會喇。領完堅振再入善會,你話我係咪叻過其他同學呢?我第日教埋佢地禮儀都仲得呀! 

哥哥: 細佬,似乎你仲未俾聖神入去你心裡面。莫講話結出「聖神九果」,你連一果都未必有喎? 

細佬: 哥哥,咩係「聖神九果」呀?果實咁多呀?都冇聽人講過嘅。

哥哥: 聖神九果,分別係「仁愛、喜樂、平安、忍耐、容忍、良善、溫和、忠信、節制」(參教理1832╱迦五22)。只要我哋同耶穌一齊生活,實踐佢嘅教訓,自然會結齊九果㗎嘞。

細佬: 我已經好喜樂平安,對老師又忠信,打機又節制,都叻過同學仔喇! 

作者: 
阿公

【教友有問題】點解要敬禮「耶穌聖心」?

刊登日期: 
2021.06.11
主曆: 
常年期第十一主日

老婆: 老公!阿女只係為咗買零食就頂撞我呀!又成個下晝唔睬我,我個心而家抽住抽住好傷呀! 

老公: 耶穌聖心嘅形象都係受傷被刺,何況我哋普通人?,而敬禮耶穌聖心其中一項特恩就係全家和睦平安呢! 

老婆: 我哋剛剛咪慶祝咗耶穌聖心節囉,點解仲要成個6月敬禮聖心呢? 

老公: 敬禮耶穌聖心,係為咗耶穌被刺透的心而祈禱做補贖㗎。話說喺1673年,耶穌向法國嘅聖女瑪加利大(Margaret Mary Alacoque)顯現佢嗰顆俾棘茨緊箍住、血淋淋嘅聖心。而喺1675年6月最後一次嘅顯現,耶穌話俾聖女知,為咗賠補佢喺聖體聖事所受嘅凌辱,教會應該立一個瞻禮。 

作者: 
阿公

【教友有問題】彌撒用邊啲麪餅?

刊登日期: 
2021.06.04
主曆: 
基督聖體聖血節

阿女: 媽咪你睇!呢間超市係咪有「麪餅」賣呀?個餅又白又圓。今個主日係「聖體聖血節」,可以買嚟送俾堂區呀! 

阿媽: 你放番低盒餅先,呢啲係小食嚟㗎。製作聖體有規有矩,唔係所有麪餅都可以成為聖體㗎。

阿女: 咁聖體用邊種麪餅呀?佢又有乜唔同 ! 

阿媽: 教會要用由純小麥製作嘅無酵餅(參教廷禮儀聖事部通函,2017),同埋要有麩質,唔可以加糖或加生果,朱古力更加唔得喇 !同埋要由信譽良好的人士製作,有堂區會自己做麪餅㖭。

阿女: 咁聖血呢?同平時啲酒有乜分別? 

作者: 
阿公

Pages