• 主曆 20210822 日 常年期第廿一主日 第 4044 期

【教友有問題】四旬期以外都要守齋?

作者: 
阿公
刊登日期: 
2021.08.20
主曆: 
常年期第廿一主日

娟姐: 今晚收工不如去鋸扒啦,公司附近開咗間新餐廳,加廿蚊送羅宋湯、彩色啫喱同紅豆冰,保證飽到上心口呀! 

阿廷: 咦,今日係星期五喎,我要守齋呀。

娟姐: 而家又唔係四旬期,點解仲要守齋呢?你要做補贖咩? 

阿廷: 唔係,其實唔止四旬期,每個星期五係記念耶穌受難嘅日子,就好似我哋喺主日慶祝耶穌復活一樣。守齋係表達同耶穌一齊受苦嘅心意,棄絕自己,為自己同其他人犯過嘅罪做補贖。(參法典1249-1251) 

娟姐: 但係教區唔係寬免咗我哋星期五守齋咩? 

阿廷: 係呀,但係要做愛德或克己善工,例如節制飲食、減少娛樂消遣,同埋為需要幫助嘅人服務。而且教會俾我哋自己選擇克己方式,但都冇禁止依照傳統守小齋。如果個個星期五掛住享受,我哋會漸漸冇咗星期五紀念救主受難呢份心㗎喇。

娟姐: 辛苦咗成個禮拜,想輕鬆吓都唔得咩? 

阿廷: 得,公司附近仲有間素食社企餐廳,網上好多正評,我哋快脆搞掂埋啲手尾收工去試吓喇! 

娟姐:好呀!

 

 

 

  
捐款支持公教報  http://kkp.org.hk/donation