教友有問題

【教友有問題】點解會有大赦?

刊登日期: 
2020.12.25
主曆: 
聖家節

老公: 你個仔呀,竟然用Zoom上堂嗰陣打機!我要扔哂佢所有手機同遊戲機! 

老婆: 老公,阿仔你都有份嘅,而且家陣唔可以咁樣教仔㗎喇!不如你學教會嚟個「大赦」,比機會阿仔改過喇? 

老公: 大赦!我知!咪又係辦告解、領聖體,跟教宗意向祈禱,跟足「清單」就赦哂啲罪,未免太仁慈喇! 

老婆: 天主先冇你咁公式化。做錯嘢如果唔本住愛德去改過,罪罰就好難得到天主寬赦,修補唔番同天主嘅關係。換轉係阿仔,如果佢覺得你唔愛佢,佢只會繼續講大話去避過俾你責罰呀! 

作者: 
阿公

【教友有問題】彌撒咩時候要跪?

刊登日期: 
2020.12.18
主曆: 
將臨期第四主日

爸爸: 阿仔,你為乜全程網上彌撒都跪?你唔咩? 

孫仔: 去唔到聖堂,諗住全程跪補番數吖嘛。

爺爺: 唔好話我個乖孫啦,尊重啫。

爸爸: 彌撒入面各種行動,都係幫我哋表達情感㗎。雖然好多時候都係坐,但好似唸信經表達意向嗰陣,要企起身;搥胸就係表達悔罪。訓導篇都話「天下任何事皆有定時」啦,全程跪就表達唔到嗰份尊重㗎喇! 

爺爺: 舊時學校吓吓都提我哋跪㗎,跪得多過而家呀。又好似呀陳生陳太,每次聽見「天主」兩個字都跪啦。

作者: 
阿公

【教友有問題】點解神父著粉紅色祭衣?

刊登日期: 
2020.12.11
主曆: 
將臨期第三主日

阿仔: 冇得去彌撒呀,世界末日呀!「喜樂主日」冇哂喜樂呀! 

爸爸: 你驚咩呀?教區網站(https://catholic.org.hk/)同堂區臉書都會直播網上彌撒,你當自己返咗聖堂,亦當神父响你前面,你恭恭敬敬開部電腦參禮,啲喜樂自然會返哂嚟㗎喇。

阿仔: 老豆!點解神父會著件粉紅色祭衣?我哋男仔嚟㗎嘛,著粉紅色! 

爸爸: 好彩而家喺屋企冇其他教友,否則俾人聽到唔嚇死都笑死。神父喺將臨期第3主日,即係今個主日會著粉紅色嘅祭衣, 去預示聖誕嘅歡樂㗎。

作者: 
阿公

【教友有問題】聖堂點解放馬槽?

刊登日期: 
2020.12.04
主曆: 
將臨期第二主日

阿女: 爸爸,點解聖堂又放馬槽呢?商場都有啦!入面有禮物, 仲播卡通片㖭。聖堂嗰個咩都冇,連小耶穌都冇! 

爸爸: 聖堂嘅馬槽正宗好多,送禮物同好玩係想做生意啫,同耶穌降生救世冇關係㗎!聖堂馬槽有聖家、牧童、三賢士,最要緊有小耶穌⋯⋯齊人先至預報到呢個救恩故事㗎。

阿女: 都話唔見小耶穌咯! 

爸爸: 堂區通常响子夜彌撒嗰晚,即係小耶穌出世喇,先至安放聖嬰落去。但同時有部份人認為,耶穌基督降生咗二千幾年,已經响我哋中間啦,不妨預先安放,而學校冇子夜彌撒,有時都會咁做。

阿女: 咁聖堂嘅馬槽布置又真係同老師講嘅聖經故事近啲。咁馬槽係邊個發明㗎? 

作者: 
阿公

【教友有問題】「教宗降福狀」係乜?

刊登日期: 
2020.11.27
主曆: 
將臨期第一主日

二嬸: 明仔老豆,隔離堂區陳太俾我睇佢之前領嗰張「教宗降福狀」(宗座遐福),賀佢哋兩公婆結婚廿周年呀!教宗嘅降福呀,你話陳太幾咁幸福呢? 

二叔: 老婆,我梗記得我哋都係結婚廿周年喇。呢張降福狀好莊嚴,但同時都好簡單:其實領洗、晉鐸、結婚,甚至生日等等都申請得㗎。

二嬸: 有得申請咩?唔係聖堂派㗎咩? 

二叔: 教友都可以响教宗賑濟所網站(https://www.elemosineria. va/)直接申請,亦有人會托機構或响意大利嘅朋友申請,不過就一定冇得淘喇!其實,我都幫你報咗名,參加堂區年尾嘅聖家節婚慶彌撒,不過冇話你知,想俾個驚喜你,到時我哋都會有張降福狀呢。

作者: 
阿公

【教友有問題】點解要「聖屋」?

刊登日期: 
2020.11.20
主曆: 
常年期第卅四主日

 

老婆:老公老公,呢間新屋就係我哋捱咗十年麪包嘅成果喇!為咗住得安心啲,阿媽話要「拜四角」當驅吓邪嘢喇,習俗嚟嘅啫,神父唔會鬧啩? 

老公:神父唔會隨便鬧人,但一定希望教友家庭重視天主呀! 搬新屋唔駛做埋咁多古怪嘢,請神父「聖屋」就得喇。

老婆:咁快啲叫神父同我哋間屋「開光」喇! 

老公:開盞燈就光啦。聖屋唔只係神父灑聖水淨化間屋咁簡單,而呢份祝福會入到家庭生活當中。聖屋嗰陣,神父會帶領我哋祈禱同讀聖經,等呢個家成為一個祈禱、愛聖言、愛主愛人嘅地方。一家人和氣平安,就唔駛擔心其他嘢喇。

老婆:聖屋喺屋入面咋?不如再搵個耶穌像放喺門外,擋住邪嘢唔好入屋囉? 

作者: 
阿公

【教友有問題】教友要睇星座做人嗎?

刊登日期: 
2020.11.13
主曆: 
常年期第卅三主日

女朋友: 唔睬你呀!星座大師本新書話,你出年有機會有第二個女朋友,我哋仲可能會分手㖭呀!我好嬲呀! 點解係你飛我唔係我飛你喎! 

男朋友: 呢啲都好信!你舊年夠話佢預測我有大病啦,而家咪又乞嗤都冇打個!我哋天主教徒,信天主就夠啦! 

女朋友: 我唔係信星座,只係想了解自己多啲,求個心安啫。

男朋友: 想了解自己多啲,其實平時多啲睇聖經,之後就住經文做反省,又或者參加信仰小團體,响聚會上互相提點!了解自己未必要靠星座書嘅,況且觀察星座同占星術,都有啲係求緊神秘力量嘅心理,會違反我哋對唯一天主應有嘅敬意㗎。(參教理2116) 

女朋友: 咁又係!但呢啲書早就印定哂放喺書店,唔揭嚟睇吓咪好嘥! 

作者: 
阿公

【教友有問題】墳場點解有聖像?

刊登日期: 
2020.11.06
主曆: 
常年期第卅二主日

學生: 老師,今次考察天主教墳場,見識咗好多神父修女同教友嘅墳墓呢。咁點解墳場有咁多聖像?唔通係為咗驅鬼? 

老師: 你再亂講,我就驅走你。呢啲聖像一來用嚟紀念同識別先人,二來可以反映先人嘅信仰,例如有啲先人孝愛聖母,後人就安一尊聖母像。19世紀嘅墓地比較多安放聖像,而家少好多啦。

學生: 第日我整個「復仇者聯盟」放喺自己墓碑上先得! 

老師: 墳場有規有矩,況且漫畫形像又唔關信仰事。

學生: 乜都關信仰事咩!我夠見嗰邊有條爛石柱啦,唔通又關信仰事! 

老師: 折斷嘅石柱有意思㗎,係用嚟哀悼生命嘅驟然消逝。

學生: 哦,我仲以為日久失修添! 

老師: 墳場維修確係好大工程,而每次打風落雨之後,都會清理同整修墳場,至可以好似而家咁井井有條。

學生: 嘩,咁大笪地方,咪要好多錢維修! 

作者: 
阿公

【教友有問題】玫瑰經點解加「光明奧跡」?

刊登日期: 
2020.10.16
主曆: 
常年期第廿九主日

嫲嫲:玫瑰經好好㗎,佢嘅20端奧跡好似成本聖經咁豐富,講晒耶穌生平。乖孫,咁你最鍾意邊部份呢? 

孫女: 我最鐘意「光明」奧跡,因為耶穌嘅傳教事跡好精彩。

嫲嫲:其實我哋嗰個年代有「歡喜」、「痛苦」同「榮福」奧跡,唔知點解後來又加咗「光明」奧跡呢? 

孫女: 慕道團導師話,聖若望保祿二世教宗見到玫瑰經講完耶穌降生,就直接講受苦,中間冇提過傳教,好似若有所失, 於是就响2002年加入「光明五端」,補充番耶穌建立聖體聖事呢一段光明奧跡,令玫瑰經更似一部「福音綱要」呢。

嫲嫲: 神父講過我知加咗邊五端,分別係耶穌响約但河受洗、耶穌參加加納婚宴、耶穌宣講天國福音、大博爾山顯容、建立聖體聖事。不過,我都係鍾意唸歡喜奧跡多啲,開心吖嘛! 

孫女: 教會建議我哋,可以喺星期一同星期六默想歡喜奧跡;星期二同星期五默想痛苦奧跡;星期三同星期日默想榮福奧跡;星期四默想光明奧跡。而星期日都可以按教會節日,唸適合嘅奧跡。

作者: 
阿公

【教友有問題】點解會有《玫瑰經》?

刊登日期: 
2020.10.02
主曆: 
常年期第廿七主日

爸爸: 10月「玫瑰月」啦,要多啲唸玫瑰經呀。

阿仔: 收到!爸爸、爸爸,玫瑰經係邊個發明㗎? 

爸爸: 玫瑰經响歐洲中世紀已經出現,係由修院嘅日課演變出嚟。修士同教友都會手持唸珠計自己唸咗幾多次。

阿仔: 哦,原來唸珠係要嚟計數嘅! 

爸爸: 唔係,相傳响12世紀,聖母顯現俾聖道明,就係手持唸珠,並囑咐聖道明教人唸玫瑰經,為當時異端者嘅悔改而祈禱。

阿仔: 咁點解10月係玫瑰月呀? 

爸爸: 相傳响1571年,歐洲嘅教友因為熱心唸玫瑰經,得聖母幫助去抵禦外敵侵略,仲响10月7日果場戰事大獲全勝。後來教會將呢日訂為玫瑰聖母節,令更多教友唸玫瑰經。到1883年,教宗良十三世就正式訂10月做玫瑰月嘞。

阿仔: 原來玫瑰經咁多相傳故事,等我一陣去考吓同學仔先。

 

作者: 
阿公

Pages